Leja mjedisore për ndërtimin e hidrocentraleve mbi Kanionet e Osumit është e pavlefshme sepse i ka kaluar afati.

Vlerësimi i ndikimit në mjedis për ndërtimin e dy hidrocentraleve, ose ndryshe leja mjedisore është miratuar nga Agjencia Kombëtare e Mjedisit në datën 26 mars të vitit 2015, por në pikën 8.2 të saj thuhet:

“Mosfillimi i aktivitetit brenda një periudhe dy vjeçare sjell për pasojë pavlefshmërinë e vendimit për ushtrimin e këtij aktiviteti”.

Pra leja mjedisore ka patur afat deri në në 26 mars të vitit 2017 dhe meqenëse deri në këtë datë ndërtimi i HEC-eve nuk ka filluar, kjo leje është bërë automatikisht e pavlefshme.

Sipas ligjit, koncesionari nuk mund të fillojë ndërtimin e hidrocentraleve pa marrë një tjetër leje mjedisore, e cila lëshohet nga agjencia kombëtare e mjedisit, një institucion në varësi të ministrisë së mjedisit. Nëse agjencia nuk e rionovon lejen e mjedisit, atëherë kontrata koncesionare është aktualisht e rrëzuar, shkruan Top Channel.

Ditët e fundit ministria e Mjedisit dhe ajo e Energjisë janë përfshirë në një ping-pong, duke u përpjekur të largojnë përgjegjësinë nga vetja. Në datën 8 janar, ministri i Mjedisit Blendi Klosi, përmes një memoje i ka kërkuar homologut të tij të Energjisë Damian Gjiknuri që të anulojë koncesionin. Këtë të mërkurë Ministria e Energjisë deklaroi se është e gatshme ta anulojë koncesionin nëse ministria e Mjedisit e shpall lejen mjedisore të pavlefshme dhe nuk e rinovon atë.

Por teksa qeveria luan ping-pong brenda vetes, dokumentet tregojnë se ajo i ka të gjitha mundësitë ligjore për ta ndalur shkatërrimin e Kanioneve të Osumit, duke filluar nga mosdhënia e lejes së mjedisit. Ajo që mbetet për t’u parë është nëse ka vullnetin përtej ping-pongut të përgjegjësive./Top Channel